Ek bahut hi purani kahawat h:
Khud hi ko kar buland itna ki khuda bande se khud puche
Bol teri raza kya hai….
Aur is kahawat ko sahi mayno me yadi kisi ne sach karke
dikhaya hai to vo hain Shri “Narendra Damodardas Modi”.
Sabse pehle mein yaha
par yeh spasht kar dena chahugi ki yeh lekh kisi rajneetik drishtikon se nahi
likha gya h naa hi iska maksad modiji ka gungan karna hai..kyuki aisa to bahut
se anubhavi lekhak pehle hi kar chuke h. Is lekh ke maadhyam se mai to kewal
apne liye evam apne jaise karodo yuvao ke liye ek ‘prernastrot’ talaash rahi
hu…
Mai kisi rajnitik party ke netashri se prabhavit nhi hui
isliye mere liye ye mayne nahi rakhta ki ve kaunsi party vishesh se talluk
rakhte hai. Mai to prerit hui hu ek aise ‘sadharan’ vyakti se jisne apni
‘asaadharan’ ”soch” se vishwa ke sabse bade loktantra ke pradhanmantri hone ka
gaurav prapta kiya.
Unke chai bechne se
lekar sangh pracharak banne,tadupraant mukhyamantri banne ki kahani to sabko
gyaat hi h. Aur isme kuch naya bhi to nahi… Akhir Amitabh bacchan ho ya ambani,adani…sabne apne
jivan ki shurwat isi prakar ki kathinaiyo se joojh kar hi to ki thi.
Paruntu jis baat ne
mujhe aakarshit kiya,vah h godhra kand ki ghatna se lekar 7RCR tak ka unka
safar…
Vahi godhra kaand
jisne modiji ko sabki nazro me khalnayak ke taur par sthapit kar dia. Vahi modi
jinko lekar vipaksh me to kya swayam party me bhi matbhed jaari raha, Jinke
liye vishwa superpower America ne bhi apne darwaaze humesha ke liye band kar
liye….
Unhone ekaek aisa kya kar dia ki saari ki saari paristhiti hi ulat pad
gyi? Aaj vohi Khalnayak RASHTRANAYAK ban chala hai…jinki chavi party ke liye
daagdaar saabit ho rhi thi,aj vohi party unki chatrachaya ke liye agrasar hai..aur
to aur vohi america jisne apne darwaaze unke liye band kar diye the aaj khushi
se unse milne ke liye tatpar hai..
Agar isi pravah me socha jaaye to sabkuch ek sapna sa…
jaadui sa mehsoos hota h… parantu yehi HAQUEEQUAT hai.
Gujrat ke ek chote se gaun ke saadharan parivar se aane
vale,chai bechkar apni guzar basar karne waale,jinke paas na to koi asaadharan
degree thi aur naa hi angrezi ka atyadhik gyaan.Aise vyakti jo kabhi pradhanmantri ke liye kursiya lagaya
karte the.. aaj swayam kursidhaari ban gye..
Parantu yeh sab akasmaat nahi hua hai. Modiji jitney kushal prabandhak hain utne hi dridh
rajneetigya bhi.Paristhiti ko bhaanp kar sahi kadam uthana unhe bakhoobi ata hai.
Shayad isi karan ve pehle hi jaan gye ki mazhab aur jaativaad se banta desh
evam mehngai aur bhrashtachar se trast logo ko keval vikas ki raah hi
dikhayi ja sakti hai. Jis technology me
ve swayam ko kamzor paate the usi technology ko apni shakti banakar unhone ek mazboot janadhaar taiyar kiya. Vohi log jo
unhe ek bhakshak ke roop me dekhte the aj unhe unme apna sabse bada rakshak dikh raha
hai. Unki anoothi ranneeti ne aj unhe us sthan par pahuchaya hai jahan ki
parikalpana karna bhi kuch samay pehle tak mushkil tha. Aur apne is safar se ve hume bhi
ye sikha gye ki :
Har naa ka matlab inkaar nahi hota
Har nakaami ka matlab haar nahi hota
Hawao ka rukh hum bhi mod sakte hain
Toote sapno ko fir se jod sakte hain
Zindagi nahi ruk jaati chand mushkilo ki khatir
Jo khud par ho poora vishwaas
To samaaj kya cheez hai
Hum swayam BHAGYA ki zanziro ko bhi tod sakte hain
To aaiye hum bhi is kahani se seekh le aur aage badhe. Kya
pta hmare prayas kuch saalo baad hume bhi aise hi kisi lekh ka Vishay bana de…
